@maharashtracity
राज्य सरकारने नियुक्त केलेल्या टास्क फोर्सचा अहवाल सादर
मंत्रिमंडळासमोर सादर करण्यासाठी तातडीने प्रस्ताव तयार करण्याचे धनंजय मुंडे यांचे निर्देश
मुंबई: ज्येष्ठ नागरिकांच्या मोफत आरोग्य तपासणी संदर्भात प्रस्तावित करण्यात आलेल्या शरद शतम् आरोग्य योजनेची कार्यपद्धती व समाविष्ट करावयाच्या आरोग्य तपासण्या यासाठी नियुक्त करण्यात आलेल्या टास्क फोर्सचा (Task Force) अहवाल राज्य सरकारला प्राप्त झाला आहे. या योजनेला मंत्रिमंडळ मान्यतेसाठी तातडीने प्रस्ताव तयार करण्याचे निर्देश ना. धनंजय मुंडे (Minister Dhananjay Munde) यांनी विभागाला दिले आहेत.
राज्य सरकारच्या सामाजिक न्याय (Social justice) व विशेष सहाय्य विभागामार्फत मंत्री धनंजय मुंडे यांच्या संकल्पनेतून शरद शतम् योजना साकार होत आहे. या योजनेत समाविष्ट करावयाच्या आरोग्य तपासण्या, ज्येष्ठ नागरिकांचे सर्वेक्षण, आजारांचे निदान झाल्यास विविध योजनांचा समन्वय साधून उपचार मिळवून देणे अशी योजनेची कार्यपद्धती निश्चित करण्यात येणार आहे.
त्यासाठी आरोग्य विभागातील वरिष्ठ संचालक डॉ. सुधाकर शिंदे यांच्या अध्यक्षतेखाली आरोग्य विभागातील संचालक दर्जाचे अधिकारी, ज्येष्ठ नागरिकांसाठी काम करणाऱ्या काही नामांकित सेवाभावी संस्थांचे प्रतिनिधी यांची मिळून एक समिती स्थापन करण्यात आली होती.
या समितीने आपला अहवाल आज (दिनांक 23) सामाजिक न्याय विभागाला सादर केला. त्यानुसार विभागाने मंत्रिमंडळाच्या मंजुरीसाठी योजनेचा प्रस्ताव तातडीने तयार करण्याचे निर्देश मंत्री मुंडे यांनी दिले आहेत.
Also Read: भाजपाचे अमरीश पटेल तर महाविकास आघाडीचे गौरव वाणी यांचा उमेदवारी दाखल
ज्येष्ठ नागरिकांना (Senior Citizen) काही आजार आढळला तरच आपण त्यांना दवाखान्यात घेऊन जातो. बऱ्याचदा शरीरात तोपर्यंत एखादा आजार मोठा झालेला असतो. त्यामुळे वर्षातून किमान एकदा सर्व प्रकारची आरोग्य तपासणी केली तर वेळेवर लहान- मोठ्या आजारांचे निदान व वेळेवर उपचार केले जाऊ शकतात.
या तपासण्या पूर्णपणे मोफत असाव्यात तसेच काही आजाराचे निदान झाल्यास शासनाच्या विविध योजनांचा लाभ मिळवून देऊन कमीत कमी खर्चात इलाज केला जावा, अशी या योजनेची मूळ संकल्पना असल्याचे धनंजय मुंडे म्हणाले.
दरम्यान भारतात अशा प्रकारची योजना राबवणारे महाराष्ट्र हे पहिले राज्य ठरणार आहे. या योजनेचा फायदा राज्यातील लाखो गरीब, निराधार त्याचबरोबर मध्यमवर्गीय कुटुंबातील ज्येष्ठ नागरिकांना मिळणार आहे.
ज्येष्ठ नागरिकांसाठी काम करणाऱ्या अनेक सामाजिक संस्थांनी या योजनेचे स्वागत केले आहे. तर डिसेंम्बर महिन्यात ही योजना मंजूर करून कार्यान्वित करण्याचा आमचा प्रयत्न असल्याचे मुंडे यांनी सांगितले.
